Адной са славутасцяў Слоніма з'яўляецца прыватны музей “Добрыя простыя рэчы” Ніны і Валерыя Анішчыкаў. Пачатак калекцыі быў пакладзены ў 1978 годзе. На сёння ў музеі захоўваецца каля 200 экспанатаў.

У музеі шырока прадстаўлены прасы – драўляныя, латуневыя, суцэльнаметалічныя, чыгунныя з укладышамі, алюмініевыя, першыя электрычныя і мноства іншых. Ёсць нават асаблівыя экспанаты: прас канца XVIII стагоддзя, а таксама прас велічынёй з запалкавы карабок, прызначаны для прасавання карунак.

У музеі прадстаўлена таксама калекцыя падкоў і вупражы. Ёсць круглая падкова XVI–XVII стагоддзяў, прызначаная для коней крымскіх татар. Тут і падкова 1941 года – узор падковы, якія былі ў бельгійскіх цяжкавагавых коней-першэронаў, што перавозілі ў ваенныя гады гарматы. Збруя прадстаўлена хамутамі, путамі, страмёнамі.

Наведвальнікі маюць магчымасць завесці стары патэфон і паслухаць паланэз Агінскага “Развітанне з Радзімай”. У калекцыі Анішчыкаў прыблізна 250 кружэлак для патэфона.

Калекцыя гадзіннікаў досыць сціплая, але ёсць вельмі цікавыя экземпляры: гадзіннікі фірм Leroi A Paris, Bekker, насценны гадзіннік з зязюляй.

Таксама ў хатнім музеі ёсць калекцыя папяровых грошай і манет Расійскай імперыі, Савецкага Саюза, незалежнай Рэспублікі Беларусі і іншых краін свету. Дапаўняе экспазіцыю багатая бібліятэка: кнігі пачатку XIX і пачатку XX стагоддзяў, розныя каштоўныя энцыклапедыі, матэрыялы па гісторыі Беларусі і Слонімшчыны.

Дата публікацыі: 16.05.2022.

---

Для зручнай навігацыі па славутасцях выкарыстайце БЯСПЛАТНУЮ мабільную праграму